الحلقه الأولى

(وفاة شريف)

هاى، إزيكم ، طبعاً مستغربين من الدخله دى مش كدا؟، بتسألو نفسكم مين دى وعايزه إيه؟

أنا أقولكم:

أنا إسمى منه ، عمرى خمسين سنه، كبيره حبتين مش كدا، هو كدا أكيد . ح تسألو نفسكو أنا عايزه منكم إيه وإيه سبب وجودى هنا؟

أقولكم:

أنا حاسه إنى كبرت ، مش ضامنه بكره يحصلى إيه، وبصراحه أكتر ، صحتى بقت فى النازل، كل يوم شكوى من مشكله صحيه مختلفه عن اللى قبلها، قدرتى على بذل أى مجهود ولو بسيط بقت محدوده، يبقى أستنى إيه ، فاضل إيه عشان أكتب مذكراتى، دانا لازم ألحق وأكتبها قبل ماالزمن يطوينى ويطويها وخصوصاً إن المذكرات دى شاهد على عصر وعلى أحداث مهمه مرت بحياتنا.

ح أبتدى مذكراتى من بداية صحوة الذاكره عندى

أوضح حاجه فاكراها ظروف وفاة أخويا الصغير، كان أول عهد ليا بمعنى الموت ، الظاهر إنها كانت القلم اللى فوقنى على الدنيا، صحانى من توهان الطفولة البريئة، تاريخ المرض لأخويا ماأخدش أكتر من تلات أيام.

قصة المرض بدأت بقرارلبابا فى يوم من أيام الصيف الحاره جداً إننا ننزل البحر معاه ، أنا وأختى وأخويا الصغير كان عمره حوالى سنه ونص ، فاكراه كأنه واقف قصادى ببشرته البيضا وعينيه الزرقا المليانه بالذكاء والتحدى ، انا حتى فاكره إنه كان لابس مايوه لونه أزرق غامق، كنا فى منتهى السعاده ، ماما إستنت فى الكبينه عشان تحضر الغدا وإحنا رحنا البحر مع بابا، كنا بنجرى حواليه فرحانين ، بابا نادر ما بياخدنا البحر لأنه بيخاف علينا جداً ، مش عارفه إيه اللى خلاه يقرر إننا ننزل البحر فى اليوم دا بالذات ، يمكن القدر حب يدينا ذكرى حلوه نفتكر أخونا بيها، المهم .. فى اليوم دا بلليل صحينا على حركة ماما وبابا فى البيت ماما كانت بتعيط وتكلم أخويا : مالك يا شريف مالك ياماما ، إيه اللى سخنك كدا ياحبيبى وبابا بيحاول يهديها وهو بيعمل كمدات لشريف ، وأول ما الشمس طلعت بابا جرى على دكتور جارنا يستشيره فى الحاله ، الدكتور عدنان ساكن فى كابينته ورا الكابينه بتاعتنا، الدكتور عدنان كشف على شريف وقال لبابا بمنتهى الثقه ، لا لا مالكش حق ،إيه القلق دا كله ياراجل ، الولد بيسنن ودا سبب إرتفاع درجة حرارته .

ماما إستمرت فى عمل الكمادات لشريف لكن الحراره مش راضيه تنزل ، مفيش أدويه جايبه نتيجه وحالة شريف بتتدهور، مابقاش بيتحرك ، ولابيتكلم مش بنسمع غير تأوهاته وصوت ماما وهيا بتعيط وبتناديه : رد عليا ياشريف، رد على ماما ياحبيبى.

تالت يوم صحينا على ماما وبابا لابسين وخارجين بشريف وبابا سابنا مع عمى الصغير فى الكابينه وقاللنا إحنا رايحين المستشفى ، مش عايز شقاوه ، وطبعاً كان بيتكلم ويوجه كلامه لنهال أختى الأصغر لأنها كانت شقيه جداً ، وتعرضت قبل كدا لإرتجاج فى المخ ، وكسر فى الدراع نتيجة شقاوتها .

بعد خروج بابا وماما ، نهال صممت إنها تلعب على السلم وكان السلم مش عالى دا يادوب تلات سلمات ، فكانت بتطلع على سور السلم وتنط على الرمل من إرتفاع نص متر تقريباً وهى بتنط وقعت على الرمل وزلطه صغيره خبطت فى عضمة الساق اليمين ،عيطت شويه وسكتت وقامت تنط تانى ، أما أنا فكنت بأتفرج عليها وهيا بتنط وأضحك على شقاوتها وهى بتغنى الموجه بتجرى ورا الموجه عايزه تطولها.

فجأه وإحنا بنلعب بابا دخل علينا وكان وشه متغير ، أول مره أشوف بابا كدا وكأنه كان بيعيط ، طلب منى أنا ونهال إننا نغير بسرعه لأننا ح نروح لبيت تيته مامة ماما ،لبسنا بسرعة وكانت نهال فرحانه جداً إنها رايحه لتيته إنما أنا كنت حاسه إن فيه حاجه مش طبيعيه وإحساسى ماكدبش عليا، طول السكه بابا مش بيتكلم ، عينيه فيها دموع لكنها مش بتنزل، ماشلتش عينى من عليه وأنا بأفكر ياترى ماله ، إيه اللى ممكن يخلى بابا يعيط، ماكنتش لسه عرفت إن فيه شبح إسمه شبح الموت ممكن يخطف مننا أعز الناس علينا فى ساعات قليله ، وصلنا بيت تيته ،أول ماإتفتح الباب إتفاجئت بلون السواد ، ستات كتير كلهم لابسين إسود، خالى الصغير أخدنا من إيدينا ودخلنا عند ماما فى الأوضه، الأوضه مليانه ستات لابسين إسود وعلى روسهم طرح سودا، ماما فى أخر الأوضه هيا كمان لابسه إسود زيهم ، بتعيط بحرقة بصوت مكتوم، وبتبوس فى شريف وهو نايم جنبها، لكن شكله متغير، وشه أبيض زياده وكأن الدم هرب منه ، مش دا اللبس اللى خرج بيه مع ماما وبابا ، كان ملفوف فى قماش أبيض وكأنه طفل لسه مولود، هوا إيه اللى حصل له شريف مش بيتحرك، ليه ماما بتعيط وتنده عليه، وإيه السواد دا كله، ليه فيه قارىء بيقرا قرآن ، كل الأسئله دى وأكتر منها دار فى ذهنى لكنى ماسألتهاش، كنت واثقه إن الأجابه ح تجينى من غير ماأسأل ، أما نهال فكانت بتلعب فى الجنينه ، مش حاسه بالمصيبه اللى مستنياها…

أكملكم الحلقه الجايه

سلام

مذكراتى من الحلقة الأولى حتى الثامنة منشورة على الرابط التالى

http://arabic.mona-soliman.com